$7.9 的媽咪麵

小學嗰陣我成日食媽咪麵，兩蚊包，幾抵食，無論小息定係屋企，總係麵不離手。明知會食到好口乾好口臭，甚至食到一地都係然後比媽咪鬧，你都係大口大口咁啪落口，仲要聽住藍毛毛演唱會，同藍毛毛一齊搖屎忽。朋友叫你分啲俾佢食，都好似割咗身上一忽肉咁，肉痛到呢。

呢啲真係童年回憶嚟！

▲ 經典廣告中的藍毛毛。相片來源：youtube截圖

不過大個咗，已經戒甩咗呢鋪癮，亦無再聽藍毛毛，而已改口叫老味麵嘅媽咪麵已經由2蚊變成$3.5 - $4，雖然貴咗啲，但間唔中都會啪番包過下口癮。咁岩番工時口痕突然想食，又咁岩經過某便利店，諗住入去啪番包（佢賣啲嘢係頗貴，諗住都係4蚊左右），點知見到個價錢......

4蚊一包我都覺得已經貴，依到仲要賣成$7.9!? 包裝黃黃地金金地啫，唔係真係金泊包裝掛？我不過只係想懷緬下食媽咪麵食到最底時，用手指啜胡椒粉個種童年味道啫......

呢$7.9完全打消咗我想食媽咪麵嘅念頭，甚至迫使我喺FB 到吐下苦水，但估唔到睇到我FB個post 嘅母親大人主動whatsapp我，問：

要不要去商場幫你買媽咪麵？

嗰一刻，真係感動到唔識形容，除咗喺wtsapp到不斷無限心心佢，又或者開番N年無玩嘅Candy crush ，入去比張車票或者心心命佢之外，我諗唔到其他方法表達我個陣內心嘅興奮。

世上始終都係媽媽好 😊

多謝你，媽咪～ ( 藍毛毛tone）

原文載於Jencfu facebook專頁，文章獲授權轉載。